Дуучин Мадонна дэлхийн хамгийн өндөр орлоготой алдартнаар тодорлоо. Тэрээр өнгөрсөн онд Опра Уинфри, Стивен Спилберг зэрэг алдартнуудаас ч илүү орлоготой ажиллажээ. Форбес сэтгүүлд нийтэлснээр 55 настай поп од "MDNA" аялан тоглолт, хувцас болон үнэртний бизнесээс нийтдээ 125 сая гаруй ам.долларын орлого олсон байна. Энэ нь Мадоннагийн нэг жилийн дотор олсон хамгийн өндөр орлого гэдгийг Форбес онцлов. 
Харин найруулагч Стивен Спилберг 100 сая ам.долларын орлоготой ажилласан байна. Түүний араас тус бүр 95 сая ам.долларын орлогоор зохиолч Эл Жэймс, шүүгч Саймон Коуэлл, продюсер Ховард Стерн нар бичигдсэн байна. Хамгийн өндөр орлоготой алдартнуудын жагсаалтын эхний 10-т нэр нь бичигдсэн, дэлхийн даяар олон сая цомгоо борлуулсан дуучин бол поп од Лэйди Гага юм. Тэрээр өнгөрсөн онд 80 сая ам.долларын орлого олжээ. Шоу бизнесийн одууд хэр хэмжээний орлоготой ажилласныг тооцож, жагсаалт гаргахын тулд Форбес сэтгүүлийнхэн шоу бизнесийг сайн мэддэг менежер, продюсерууд болон бусад удирдах албан тушаалтнуудтай ярилцсан байна.

РАЛЬДИЙ.А /shuum.mn/