Баянгол дүүргээс хотын өнгө үзэмжийг сайжруулах, иргэдийн эрүүл аюулгүй орчинд амьдрах таатай нөхцлийг бий болгох, газар ашиглалтыг сайжруулах үүднээс 2014 онд дүүргийн нутаг дэвсгэрийн 11 байршилд дээрээ хүүхдийн тоглоомын талбай бүхий газар доорх авто зогсоол болон олон давхар авто зогсоол барихаар төлөвлөөд байна.

Энэхүү ажлын хүрээнд тус дүүргийн 13 дугаар хорооны 9 дүгээр байрны зүүн талд 0,13 га газарт олон давхар зогсоол барихыг иргэд, оршин суугчдын 89,2 хувь нь дэмжсэн тул хуучны тоосгон гараажуудыг буулгаж орчин үеийн шийдэл бүхий гарааж барих гүйцэтгэгчийг сонгон шалгаруулах төслийг зарлалаа.

Мөн дүүргийн 1 дүгээр хорооны 67, 68 дугаар байрны дунд, 3 дугаар хорооны 53, 63 дугаар байрны дунд дээрээ хүүхдийн тоглоомын талбай бүхий газар доорх авто зогсоол барих ажил хэрэгжиж эхлээд байна.