Өнөөдөр Халх голын ялалтын 75 жилийн ойг тохиолдуулан Сүхбаатар дүүргийн Засаг даргын Тамгын газраас Халхын голын дайнд оролцсон ахмад дайчин Ц.Чагай, Ш.Багаажав нарт хүндэтгэл үзүүллээ.

Энэ үеэр Засаг дарга Д.Бадарсан Цэргийн штабын дарга хурандаа Л.Батаа болон Захиргаа хуулийн хэлтсийн дарга Б.Ганбаатар албаны бусад хүмүүс оролцож ахмад дайчдад Батлан хамгаалах яамны ойн медаль, гарын бэлэг, баярын ажиллагаанд оролцох урилга мөн дүүргээс тус бүр 5000000 төгрөг, алд цэнхэр хадгийн хамт гардуулж тэдний гэр бүл үр хүүхдүүдэд эрүүл энх сайн сайхан бүхнийг хүссэн юм.

Ойн хүрээнд дүүргийн зүгээс олон талт арга хэмжээ зохион байгуулж байгаа бөгөөд Ерөнхий боловсролын сургуулийн сурагчдын дунд Халх голын байлдааны түүхэн ялалтын тухай эссэ бичлэг, уран зургийн уралдаан зохион байгуулж, энэ сарын 25-29-ний өдрүүдэд Дорнод аймаг дахь Зэвсэгт хүчний 327, Хилийн цэргийн 0198, 0306 дугаар ангиудад тус дүүргээс татагдан алба хааж байгаа дайчдыг эргэх уулзалтыг зохион байгуулахаар төлөвлөн ажиллаж байна.

Халхын голын ялалт Монгол Улсын төрийн тусгаар тогтнолыг улам бэхжүүлж, нутаг дэвсгэрийн бүрэн бүтэн байдлыг хамгаалан бататгаж, Монгол Улсын нэр хүндийг олон улсын хэмжээнд өндөрт өргөсөн юм. Халхын голын байлдааны ялалт нь Алс дорнодод гамшигт дайны аюулыг хазаарлан зогсоож, дэлхийн дайны галыг Евроазийн эх газарт хоёр талаас зэрэг ноцоох гэсэн фашист эвслийн түрэмгий төлөвлөгөөг тасалдуулахад хүргэсэн билээ.

Эдүгээ Халхын голын дайнд оролцож эх орныхоо төлөө тулалдаж явсан дайчдаас 34 ахмад энх тунх байна.