Үндэсний хэмжээний хамгийн олон уншигчтай 7 хоног тутмын шилдэг сэтгүүл TV ZONE-ий шинэ дугаар уншигч танд цоо шинэ дүр төрхөөр хүрч байна. Долоо хоног бүр таны гэрт ихэр TV ZONE хүрэх болсон тухай сонирхолтой мэдээллийг хүргэе.  
Дүрс: Шинэ дугаарынхаа хөтөч мэдээллийн өмнө сэтгүүлийн редакцийн зүгээс уншигч танд барьж байгаа бэлгийг танилцуулъя. Шинэ дугаараасаа эхлэн бид сэтгүүлээ хоёр талаас нь уншдаг сонирхолтой шийдлээр хүргэж байна. Гэр бүлийн гишүүн бүрийн оюуны хэрэгцээнд нийцсэн нийтлэл, ярилцлага, танин мэдэхүйн мэдээ мэдээллээс эхлээд оюуны зугаа, оддын дуулиан шуугиан, хамгийн сүүлийн үеийн спорт, кино урлагийн мэдээллийг бүрдүүлсэн TV ZONE сэтгүүлийн шинэ дүр төрх уншигч танд таалагдана гэдэгт итгэж байна. Ингээд долоо хоног бүр таны гэрт зочлох ихэр TV ZONE-ий шинэ дугаарт ямар мэдээлэл багтсаныг танилцуулъя.
Дугаарын зочноор “Нандиагийн ток шоу”-ны хөтлөгч, сэтгүүлч Н.Нандинцэцэгийг урилаа. “Хүн хүссэн зүйлдээ л амжилт гаргадаг” гэсэн үгийг зарчмаа болгосон залуу бүсгүй чухам юу хүсч мөрөөдөж байдгийг та Дугаарын зочны ярилцлагаас уншаарай.

Сэтгүүлээ нээгээд хамгийн түрүүнд уншдаг Шар хуудаснаасаа “Х.Баттулга сайдын чих халууцуулагч хүү, бахархал болсон охиных нь талаар, уран бүтээлийн чанараараа эздийнхээ өрийг цайруулсан шинэ клипний тухай, хошин урлагийн мастер Баатархүү түмнийхээ буяныг хүртсэний талархалд өөрөө буя н үйлдэж яваа тухай, зөв шуналтай байх нь бас сайн зуршил болохыг, Кивигийн Намуунаагийн хар цагааныг мэдрүүлэх шинэ уран бүтээл, Зууны манлай Сараа өөр салбарт хүч үзэх болсон тухай гээд олон сонирхолтой мэдээллийг уншаарай.
Дэлхийн талыг эзэлж, тэмтрэн шунаглах дайсныг сэлэмний ир, морины туурайгаар дарчиж явсан хүчирхэг Чингис хаан хойч үе, үр садаа иймхэн зүйлд өвдөг сөхөрч, барих барьц, харагдах тэмдэггүй “дайсан”-д эзлэгдэн сүйрнэ чинээ зүүдлээ ч үгүй биз… хэмээн өнөө цагийн бидний эмгэнэл агаарын бохирдол, утааны асуудлыг Энэ сэдвээр… үргэлжлүүлэн хөндлөө. Сэтгүүлч У.Дашбатын нийтлэлийг үргэлжлүүлэн уншаарай.  

Уншигчдын хэрэгтэй мэдээллээ авдаг ахуйн зөвлөгөөний буланд энэ удаад хүйтэн сэрүүний улиралд дархлаагаа хэрхэн сэргээх талаар зөвлөсөн бол “Надад нэг асуулт байна” буландаа уншигчдын ирүүлсэн асуултанд хуульчийн тайлбарыг бэлтгэлээ. Магадгүй таны мэдэхгүй зүйлийн хариулт ч багтсан байж болно.
Энэ дугаараасаа эхлэн +18 буланг уншигч таны өмнө нээж байна. Энэ буландаа бид гэр бүлийн уур амьсгал, залуу хосуудын хайр сэтгэлийн нандин нууцад хэрэгтэй сонирхолтой, ёс зүйтэй мэдээлэл, зөвлөгөө, өгүүллэг нийтэлж байхаар шийдэж, анхны дугаартаа уншигч эрчүүддээ хэрэгтэй чухал мэдээллийг хүргэж байна.
Уншигч таны дуртай “Хайртай хайргүй” буланд Сайн гэр бүл болохын нууц, ая тухтай гал тогооны өрөөг хэрхэн бий болгох гээд гэр бүлийн гишүүн бүрийн оюуны хэрэгцээнд зориулсан хэрэгтэй мэдээлэл бий. 
Мэдээж бяцхан уншигч нартаа зориулсан үлгэр, оньсого, буддаг зургаас эхлээд сонжоонд дуртай сонжоочдын зугаа, үгийн сүлжээ, судоку, шидэт зураг гээд Зав гарлаа булан иж бүрнээрээ танд хүрч байна. 
Мэдээж, долоо хоног тутмын сэтгүүлийн чухал мэдээллийн нэг хамгийн олон телевизийн хөтөлбөрийг оросын сонирхолтой зарим сувгийн хөтөлбөрийн хамт нийтэллээ.
TV ZONE сэтгүүлээ гэр бүлийнхээ гишүүн болгосон уншигч танд баярлалаа.