Намрын налгар өдрүүдэд агаар сэлбэх шинэ цасны хамт танд хүрэх ихэр сэтгүүлийнхээ шинэ дугаарын мэдээ мэдээллийг багцлан хүргэе.  Шинэ дугаарын нүүрийг амтлаг жимснүүд чимлээ. Кивигийнхэн тараагүй, тарахгүй гэдгээ албан ёсоор мэдэгдэж, Дугаарын зочид болон уригдан уран бүтээлийнхээ тухай ярилцлаа.
Хийж бүтээснээрээ олонд танигдсан эрхмүүдийн хор шаргүйхэн мэдээлэл энэ удаад, “Том” эр хайрын дууны ханхүү болохыг, “Universe – Best Songs” наадмын хөтлөгчдийн авьяас, хобби, мэргэжлийнх нь сонин хачинг, хийлийн эгшгээр хүний сэтгэлд нэгийг бодогдуулах Дээгийгийн шинэ уран бүтээл гээд олон сонирхол татам мэдээлэл танд зориулагдлаа.
Сэтгүүлийн өнгө төрхийг нийтлэлийн бодлогоороо илэрхийлж байдаг “Энэ сэдвээр” булан “Баасан ах”-ын төрсөн өдрийн эргэн тойрон дахь амьдралыг ониллоо. Бааска ахаар сонин юу байгааг сонирхоорой.  “Миний дуунууд-2011” тоглолтын онцлох мэдээ мэдээллийг, агшин бүрийг нь алдалгүй хальснаа буулгасан гэрэл зургийн хамт танд хүргэж байна.

Солонгосын төдийгүй Азийн орнуудад олон фэнүүдийг араасаа дагуулдаг Тиарагийн нууц юу байв? “Карьер” булан Солонгосын К-поп ертөнцийн үзэсгэлэнт “Титэм”-ийн эзэд болох ТИАРА хамтлагийг танилцууллаа.

Энэ мэт эмэгтэйчүүд, эрчүүд, хүүхдүүддээ зориулах булан бүхэн цоо шинэ мэдээ мэдээллээр баяжигдан, шинэ дугаараараа таны мэдлэгт дусал болохыг зорьлоо.  Түүнчлэн та шинэ долоо хоногт Монголын болон Оросын онцлох сувгууд танд зориулж ямар ямар хөтөлбөр бэлтгэснийг цаг агаарын урьдчилсан мэдээ, өрнө дорнын зурхайн зурлага, энэ өдөр, онч үгийн хамт тольдон хараарай.  “Бидний аз жаргалын аравны есөн хувь нь эрүүл мэндээс шалтгаалдаг” хэмээх суут эрхэм Шопенхауэр хэлсэн байдаг. Эрхэм уншигч таны гэр бүлийн гишүүн бүр эрүүл энх байж, аз жаргалаар бялхаж байг ээ!
Биднийг гэр бүлийнхээ гишүүн болгосон танд талархнам! 

Таныг хүндэтгэсэн: TV ZONE сэтгүүл