Үндэсний хэмжээний хамгийн олон уншигч, захиалагчтай 7 хоног тутмын шилдэг сэтгүүл TV ZONE-ий шинэхэн дугаар танд хүрч байна. Үргэлж шинэ бүхний илэрхийлэл байхыг эрмэлздэг TV ZONE сэтгүүлийн хамт олон уншигч танд энэ дугаараараа ямар мэдээлэл бэлтгэснээ тоймлон хүргэе.

7 хоног бүр уншигч таныг урлаг, соёлын хүндтэй хүмүүсийн дотоод ертөнцөөр аялуулдаг “Дугаарын зочин” буландаа эмэгтэйчүүдийн дуу хоолой, үзэл бодлын илэрхийлэл болж яваа зохиолч, сэтгүүлч Б.Шүүдэрцэцэгийг урилаа. “Зохиолч хүн эх хэлнийхээ манаанд зогсоо харуул юм” хэмээх түүний ярилцлагаас үзэл бодол, хүсэл зорилготой нь уншигч та танилцаарай.
Амттай булангуудын маань нэг оддын шар хуудсаар энэ жил рок попынхон сонсогч фенүүддээ гайхалтай гэнэтийн бэлгээр тэсрэлт хийж байгаа тухай сөхлөө. Дуучин Ч.Солонго одоо хэр нь Sweetymotion-доо хайртай хэвээр гэнэ. Эхнэрээрээ гоёсон “Люмино”-гийн дуучин Бажи видео авардсаас цомтой буцсан тухай болон үнэт эдлэлд дурлах рок попын эрчүүдийн талаар олон сонирхолтой мэдээлэл “шар хуудас”-т багтсан.

Уншигч таны алгасахын аргагүй булангуудын нэг болсон “Энэ сэдвээр”. Бичил уурхай тойрсон элдэв асуудлыг “Доржийн амьдрал буюу Монголчуудын ирээдүй” гарчиг дор хөндлөө. Гэхдээ та нэгэн хэвийн уншдаг уул уурхайн нийтлэлийг үүнээс унших биш, сэтгүүлчийн өөр нэгэн өнцгөөс харж үзэглэсэн нийтлэлийг унших болно. Юмыг олон талаас нь харах нь сэтгүүлчийн нэг чадвар, үүрэг билээ.
Дэлхийд нэр алдар нь цуурайтсан олны танил хүмүүсийн амьдрал, амжилтынхан нууцыг хүргэдэг “Карьер” булангаар Фейсбүүкийг үндэслэгч Марк Эллиот Закербергийг онцоллоо. Өдгөө 27-хон настай атлаа дэлхийн тэрбумтнуудын эгнээнд багтаж байгаа түүний энэ их амжилтын нууц юунд оршиж байгааг уншигч та “карьер” булангаас уншаарай.

Цаг үеийн мэдээллээс хоцрохыг хүсдэггүй уншигчид маань энэ дугаараас “Нью-Йорк Янкийз баг шилдэг тоглогчийнхоо гэрээг асар өндөр үнээр сунгалаа”, “Шакил О’Нилийн шинэ номоо энэ сарын 15-нд худалдаанд гарна”, “Хаширдаггүй Скарлетт Йоханнсон дахин нүцгэн зургаа авахууллаа” болон Америк, Канадын бокс оффисын мэдээ зэрэг кино, спорт, холливудын элдэв дуулиан зэрэг цогц мэдээллийг авах боломжтой.
Гэр бүлийн гишүүн бүрт манай сэтгүүлийн мэдээлэл зориулагдсан байдаг учраас гэрийн эрчүүдэд зориулсан гоо сайхнаас гадна гэрт гэгээ татуулах бүсгүйчүүдэд дэлгүүр хэсэхдээ хэрхэн үр дүнтэй худалдан авалт хийх, харин багачууддаа зориулсан “хүүхэд” булан гээд бүх насныханд зориулсан мэдээлэл энэ дугаарт багтлаа.
Хамгийн гол нь таны зав цагийг хэмнэх орос, монгол ТВ хөтөлбөрүүд ч гэсэн энэ долоо хоногийн зурхай, цаг агаарийн мэдээллийн хамт бэлтгэлээ.

TV ZONE сэтгүүлээ гэр бүлийнхээ гишүүн болгосон уншигч танд баярлалаа.