Дуучин Адел энэ жилийн Грэммигийн шагнал гардуулах ёслолын үеэр анхаарлын төвд байх нь ээ. Учир нь өнгөрсөн онд хоолойндоо мэс засал хийлгэсэн дуучин энэ сарын 12-нд зохиогдох шагнал гардуулах ёслол дээр дуулах юм байна. Зургаан төрөлд нэр дэвшээд байгаа тэрээр мэс засал хийлгэснээсээ хойш таван сарын турш амьдаар дуулаагүй юм. Адел "Грэммигийн шагнал гардуулах ёслол дээр дуулахыг санал болгосонд үнэхээр баяртай байна, миний хувьд нэр энэ арга хэмжээнд оролцох нэр төрийн хэрэг" гэж мэдэгджээ.
Дуучин Мадонна шинэ хамтрагчтайгаа хамтран Африкийн Малави улсад 10 сургуулийг шинээр барихаар төлөвлөжээ. Өнгөрсөн жил поп одын эхний төсөл муу менежмент явуулснаас болж амжилтгүй болж байсан юм. Африкийн зүүн өмнөд хэсэгт орших Малави улсаас хоёр хүүхэд үрчилж авсан Мадонна 10 шинэ сургуулийг барьж байгуулснаар жилд мянган хүүхэд сурч боловсрох нөхцлөөр хангагдана гэдэгт найдаж байна. Сурагчдын тал нь охид байх юм.
Америкийн X Factor шоу багагүй асуудалтай тулгарчээ. Учир нь шүүгч Никол Ширценгер хөтлөгч Стив Жонс нар шоуны дараагийн цувралуудад оролцохгүй гэж Фокс телевизийн сүлжээ мэдээлжээ. Пуссикат хамтлагийн дуучин байсан Никол энэ мэдээлэлд ямар нэг хариу өгөөгүй байна. Хачирхалтай нь шоуны ойрын эх сурвалжийн мэдээлснээр шүүгч Пола Абдула мөн ажлаасаа гарчээ. Абдула Америкийн шүтээн шоуг орхисны дараа Саймон Коуэл түүнийг X Factor шоуны шүүгчээр авч байсан юм.
Ням гаригт Колумбийн алдарт дуучин Шакира урлагт оруулсан хувь нэмрийнхээ төлөө Канн хотод Францын соёлын яамны медалаар шагнуулсан байна.  Шакирагаас өмнө энэ шагналыг Клинт Иствүд, Жорж Клүни нар хүртэж байжээ.
Э.АМАР