Өнгөрсөн бямба гаригт алдарт дуучин Уитни Хьюстон 48 насандаа таалал төгссөн талаар бид мэдээлж байсан билээ. Тэрээр хамгийн сүүлчийн удаа  нас барахаасаа 2 өдрийн өмнө буюу өнгөрсөн пүрэв гаригт дотны найз  Кали Прайсын Грэмми авардын номинацид нэр дэвшсэнийг нь тэмдэглэж олны өмнө гарч дуулжээ. Хьюстон найз Келли Прайст зориулж “Есүс Христ надад хайртай” гэдэг дуугаараа ая барьсан байна. Эх сурвалжуудын мэдээлж байгаагаар алдарт дуучин шөнө дунд хүртэл наргиж цэнгэсэн бөгөөд үдэшлэг дээр нэгэн дуучинтай ам муруйж, ноцолдож зууралдсан нь зурагчдын дуран хараанд буужээ. Аль нэг мэргэжлийн байгууллага баталгаажуулаагүй ч гэсэн зодооноос болсон уу яасан түүний цус хөлийг нь даган урссан байжээ. Найз Келли Прайсын ярьж байгаагаар Хьюстон тэр оройн үдэшлэг дээр цоглог, аз жаргалтай байсан бөгөөд шампанск мэтийн бага зэрэг согтууруулах ундаа уусан байжээ. Келли Прайс найзыгаа согтууруулах ундаа хэтрүүлээгүй байсан гэж батлан, өмөөрсөн аястай ярилцлага өгсөн байна. Дуучин  Хьюстон охин Бобби Кристина Брауны хамтаар Грэмми авардс наадамд оролцохоор Лос Анжелест ирэн Беверли Хилтон зочид буудалд байрлаж байжээ. Зочид буудлын ажилчдын ярьж байгаагаар Хьюстон нас барахынхаа өмнөх өдөр нэлээд цухалдсан байдалтай амралтын өрөөнүүдээр орж гарч байжээ. ТMZ вебсайтын мэдээлснээр Хьюстон нас барахынхаа өмнөх өдөр буюу баасан гаригт найзуудтайгаа бааранд цагийг өнгөрөөсөн байна. Тэрээр маргааш өдөр нь 15 цаг 15 минутын орчимд ээжтэйгээ утсаар ярин дахин нэг үдэшлэгт оролцохоор зэхэж байжээ. Түүнээс хойш 30-аад минутын дараа дуучин ухаангүй байдалтайгаар угаалгын өрөөнөөсөө олджээ. Лос Анжелесийн цагдаагийн газрын даргын ярьж байгаагаар зочид буудлын ажилчид түргэн ирэхээс өмнө анхан шатны тусламж үзүүлж эхэлсэн байжээ. 15 цаг 55 минутын орчимд түүнийг нас барсныг олон нийтэд зарлажээ. Хэдийгээр мөрдлөг, шалгалтын ажил үргэлжилж байагаа ч түүний өрөөнөөс ямар нэг мансууруулах бодис хэрэглэсэн шинж тэмдэг илрээгүй байна. Түүний биенээс шинжилгээ авчээ. Хариу нь хэдэн 7 хоногийн дараа гарна. Энэ 7 хоногт багтаан түүний шарилыг төрсөн газар болох Нью-Жерси мужийн Неварк хотод аваачиж оршуулах юм байна.
Shuum.mn