Зуны дэлгэр цагийн шинэ өдрийн мэндийг үзэгч танд хүргэхийн зэрэгцээ TV ZONE сэтгүүлийн шинэхэн дугаарын сонин хачинаас дуулгаж байна. Энэ цаг мөчид уншигч, үзэгч таны гарт 160 дахь дугаар хүрч байгаа.
Сэтгүүлийн өнгө төрхийг илэрхийлэх эхний нүүрэнд “Universe – Best Songs 2011” наадмын эхний гурван байрын шилдгийн шилдэг оролцогчид чин сэтгэлийн инээмсэглэл тодруулсаар таньтай уулзаж байна. Дугаарын зочдын сэтгэл догдлуулсан ярилцлаганд үзэгч та түр саатан, тэдэнтэй илүү дотно танилцаарай.
Хачиртайхан, амттайхан шар хуудас энэ удаад Д.Сосорбарам эрхмийн сонгодог хобби нь юу болох, чихэрний хүүхэд хэн гэдгийг, 3 толгойноос 4 нь арай л хүчтэй гэж хэний тухай хэлж буйг, мөн нэг хамтлагийн гурван гишүүний гурван өөр шашинчлал гээд сонин содон мэдээллийг унших боломжтой. Түүнчлэн TV ZONE-ийнхан бид энэ дугаараасаа эхлэн шуум.мн цахим хуудсынхантай хамтарч, “Олон өнцөг” буланг бэлтгэж байна. Энэ хэсэгт хэдэн хором ч гэсэн тухлаарай.
Хийж бүтээснээрээ бусдаас онцгойрч, амжилтын оргилд үргэлж манлайлж байдаг хүмүүсийн тухай өгүүлэх Карьер булангийн энэ удаагийн зочноор шаргал үст Шакира уригдлаа. Түүний үзэл бодол, баримтлах зарчим юу гэж тодорхойлогдсон байдгийг та сонжино биз ээ.
“Universe – Best Songs 2011” наадмын эгзэгтэй, сэтгэл догдлуулсан агшин бүхэн гэрэл зургийн кадрт хэрхэн буусныг фото цомгийн булан дэлгэж байна.
UBS телевиз ээлжит төслийн нэвтрүүлгээ танд хүргэхэд бэлэн боллоо. “Оршихуй эс оршихуй” театр урлагийн шинэ үеийг төрүүлэн гаргах зорилготой энэхүү нэвтрүүлэг таны анхаарлыг татаж байна уу? Энэ нэвтрүүлгийн тухай болон “Ирээдүй ногоон байг” уриатай “Ногоон ирээдүй” эко төслийн ээлжит мэдээ мэдээллийг танд хүргэж байна.
Сэтгүүлчийн хараанд тусч, сэтгэлд буусан нийгмийн асуудлыг хөндөх “Энэ сэдвээр” булан энэ удаад архинд донтох буруу хүмүүжлийн тухай онцолжээ. Уншигч та ч асуудлын гарцад хамтдаа нэвтэрч, өөрийн гэсэн хувь нэмрээ оруулаарай.
Зуны сайхан өдрүүдийг өөрт хэрхэн ашигтай өнгөрүүлэх, гоо сайхан, эрүүл мэндэд сарнай цэцэгс ямар ашигтайг, таны анхаарал хэрхэн төвлөрдгийг сонжих сонжоо, ажлаа амжилттай явуулахад эрсдлийг тооцох аргачлал, дэлхийн хамгийн нууцлаг хийгээд хачирхалтай далд увидастай хүмүүс хэн болох гээд сэдэв сэдвийн хүрээнд шинэ соргог мэдээ мэдээллээр баялаг шинэхэн дугаар танд зориулагдлаа.
Шинэ долоо хоногийн телевизүүдийн хөтөлбөрөө харж, үзэх сувгаа сонгонгоо өөрт хэрэгтэй мэдээллийг цаг ямагт авч, оюундаа хөрөнгө оруулалт хийдэг танд болон таны гэр бүлд амжилт хүсье.
Гэр бүлийн гишүүн бүрт зориулагдсан TV ZONE...  

Таныг хүндэтгэсэн TV ZONE сэтгүүл

Бидэнтэй холбогдох утас/ факс: 7014-1951
И-мэйл хаяг: tvzone@ubs.mn, ubs_tv_zone@yahoo.com
Шуудангийн хаяг: Монгол шуудан 24 дүгээр салбар, 505 дугаар хайрцаг