-Та өөрийгөө од гэж мэдэрдэг үү?
-Ээж маань үргэлж “Эгэл даруу бай” гэж захидаг учраас би хэзээ ч онгирч, бардамнадаггүй. Ихэнх алдартнаас ялгаатай нь би хоёрхон машинтай. Аа, тийм өөр цуглуулгын машин бий. Үүнээс олон машин хэрэггүй. Сар бүр машинаа солих шаардлага алга, тэгээд ч энэ нь ямар ч ашиггүй.
-Жүжигчний хувьд хийж чадахгүй юм гэж танд бий юу?
-Мэдээж, би бүхнийг чадахгүй. Жишээлбэл, Энтони Хопкинс шиг Ганнибал Лектерийн дүрд тоглож чадахгүй. Мөн инээдмийн кино надад их хэцүү санагддаг. Надад одоо нэг зохиол бий л дээ. Хоёр тэнэгийн дүрийг Марк Уолберг бид хоёр бүтээх ёстой. Гэхдээ надад нэг л сонин, аймаар байна.
-Тан шиг алдартай, авьяаслаг жүжигчнийг Дэниэл Эспиноза яаж ятган, “Нэвтрэх код. Кейптаун” кинондоо тоглуулж чадав аа?
-Ялагдахгүйн тулд бүхнийг хийдэг энэ баатар надад их таалагдсан. Тэр ухаантай, хүчтэй. хүмүүсийг жолоодож чаддаг. Ялагч хүний эдгээр чанарыг би их сайшаадаг. Түүнийг нойтон алчуураар тамлаж байхад ч бууж өгдөггүй шүү дээ.
-Түүний чадвар юунд байна?
-Киноны гол баатар маань маш чадварлаг худалч. Ийм хүний дүрийг үнэмшилтэй бүтээсэн би сайн жүжигчин үү, эсвэл надад түүнийх шиг зан чанар байдаг юм болов уу. Би мэдэхгүй. Ер нь нууц задлахад би чинь тусгай албаны ажилтан шүү дээ /зальжин инээмсэглэв/. Харин энэ киноны бизнес бол ердөө миний халхавч. Би кино үйлдвэрлэлд сэмхэн тагнуул хийж, янз бүрийн шагнал авах зэргээр олны анхаарлыг сарниулдаг.
-Хэрэв үнэн бол тун өвөрмөц байна. Тэр тусмаа таны Оскараар халхавчилбал. Ингэхэд таны баатар мөнгөнд дуртай юу?
-Мэдээж, мөнгөнд дуртай. Гэхдээ тэр мөнгөө юунд ч үрэх билээ. Цүнхэндээ хийгээд л яваад байдаг. Тэр ганцаархнаа, түүнд хэн ч байхгүй, хийх ч юмгүй.
-Уухаас өөр үү?
-Аа, таны ярихыг хүссэн сэдэв ердөө энэ үү.
-Та голдуу яаж амардаг вэ?
-Янз бүр. Жишээлбэл, өчигдөр нэгэн радио станц дээр уулзалт хийж, сайн найз Ленни Кравитецтэй цагийг өнгөрөөсөн. Тэр намайг энэ намар Рио-де-Жанейрод болох тоглолтдоо урьсан юм. Би тийшээ очиж үзэхийн зэрэгцээ амрахаар шийдсэн.
-Кино үзэх дуртай юу?
-Үнэнийг хэлэхэд дургүй. Надад тоглох нь илүү таалагддаг. Харин би киноны найруулагчаар ажиллахдаа маш олон кино үздэг. Ажлын шаардлагаар шүү дээ. Надад ер нь Александр Пейн, Хирт Локер нараас өөр дуртай найруулагч гэж байхгүй.
-Чухам юу бидний амьдралыг хамгийн аюултай болгодог вэ?
-Минийхээр бол өдөр бүр та бидний хүлээн авдаг асар их мэдээлэл. Энэ л бидний амьдралыг илүү эмзэг болгодог. Тэгээд ямар нэг зүйлийг яаж хурдан өөрийн болгох вэ гээд л. Энэ нь таны хувьд сайн эсэхийг бараг авч хэлэлцдэггүй. Бид өдөр бүр иймэрхүү асуултыг өөртөө тавьдаг ч тодорхой хариулт алга.
Дэлхий дээр цаг үргэлж газар хөдлөлт, цунами болон бусад гамшиг, сүйрэл тохиолдсоор ирсэн. Тохиолдох ч болно. Гэтэл олон нийтийн хэвлэл мэдээллийн хэрэгслүүд энэ тухай хүмүүст улам их ярих болж, бидэнд сөрөг мэдээлэл өгсөөр байна. Үүнээс болоод хүмүүс стресст өртөж, мэдрэлийн ядаргаанд ордог. Хэрэв хүмүүс нүүн шилжих боломжтой бол энэ тухай урьдчилан сэрэмжлүүлэх хэрэгтэй. Гэтэл та бидний урьдаас сэргийлж чадахгүй ертөнцийн мөхөл энэ тэрийн талаар тогтмол ярих нь огт өөр хэрэг. Энэ нь ямар ч утгагүй. Иймээс л миний дургүй хүрдэг.
-Та энэ хорвоо ертөнцөд сэтгэл дундуур явдаг юм аа даа?
-Би хүмүүсийн авир төрхийг хараад үнэхээр урам хугардаг. Саяхан сагсан бөмбөг үзлээ л дээ. Сэтгэл догдлом сайхан мөчүүд ар араасаа цуварч байлаа. Гэтэл хүмүүс гар утастайгаа зууралдан, мессэж бичих буюу “Твиттер”, “Фейсбүүк” рүү гэрэл зураг явуулж байх юм. Уг нь түр зуур ч гэсэн интернэтийн сүлжээгээ мартаж, тухайн цаг минутад өрнөж буй тэмцээнээс таашаал авах ёстой шүү дээ. Надад ч “iPhone” бий, гэхдээ би галзуу хэрэглэгчдийн нэг биш.
-Та хаана аюулгүй, тав тухтай байдаг вэ?
-Гэртээ, найзуудынхаа дунд. Ер нь би бурханд итгэдэг, нэлээд сүсэгтэй. Энэ л тав тухтай байдлыг мэдрэхэд хангалттай.
-Өөр юуг та кинонд тоглодог шигээ сайн хийж чадах вэ?
-Мэдэхгүй. Ямар ч гэсэн хоол хийх биш. Хэрэв би галын өрөөндөө ямар нэг хоол хийвэл дараа нь зочид маань удаан хугацааны турш жорлонд суух хэрэг гардаг. Харин би согтууруулах ундаа, ялангуяа виног сайн мэднэ. Зөвлөгөө өгч чадна шүү.
-Таны онгодыг юу хөглөдөг вэ. Таны амьдралын зарчим?
-Би цаг үргэлж ажиллах ёстой. Яагаад гэвэл юм хийгээгүй үедээ би өөрийгөө сүйтгэж байдаг. Гэхдээ би дурсамжаа бичих цаг болоогүй, тэтгэвэрт гарсан хойноо л оролдоно.
Эх сурвалж: "Өглөөний сонин"
