Фүжишима дэвжээний маэгашира Шёотэнро хэмээх Д.Нямсүрэн Кёкүтэнхо Н.Цэвэгнямтай худ ураг барилдаж түүний төрсөн дүү Н.Хишигсүрэнтэй Токио хотын нэгэн зочид буудалд хуримаа хийжээ.
Залуу хосууд өнгөрсөн долдугаар сард гэрлэлтээ батлуулсан ч хуримын ёслолоо хийгээгүй байсан аж. Хуримын ёслолд 69 дэх Их аварга Хакухо М.Даваажаргал тэргүүтэй 30 гаруй сүмоч болон Монгол, японоос уригдсан 350 зочид хүрэлцэн ирж оролцжээ. Кёкүтэнхо Н.Цэвэгням "Тавдугаар сарын башёд түрүүлээд баярлаж дуусаагүй байхад дүү маань хуримлаж дахин баяр хөөр нэмлээ" хэмээн ярьсан байна.
Асашёорюү Д.Дагвадорж, Хакухо М.Даваажаргал, Озэки Д.Харумафүжи нар хуримын ёслолоо Японд болон эх орондоо хийж байсан. Энэ шинэ хосуудын хувьд ирэх жил Монголд хуримын ёслолоо хийхээр төлөвлөсөн байна.
Д.Өлзий
МОНЦАМЭ