Роллинг Стоунз хамтлаг хагас зууны өмнө байгуулагдсан юм. Одоогоос 50 жилийн өмнө буюу 1962 оны долдугаар сарын 12-нд рок хамтлаг анхны тоглолтоо зохион байгуулж байжээ. Харин үүнээс хэдэн жилийн дараа гоцлол дуучин Мик Жаггер болон хамтлагийн бусад гишүүд поп хөгжмийн өнгө төрхийг өөрчилж, улмаар дэлхий даяар 200 сая гаруй цомгоо борлуулсан билээ. Тухайн үед хамтлагийн бүрэлдэхүүнд гитарчдаар Кэйт Ричардс, Брайн Жонс нар, бөмбөрчнөөр Чарли Уотс, аргил гитарчин Билл Вайман нар байжээ.
Лондонд байгуулагдсан хамтлагийн 1960-аад оны дундуур гаргасан Satisfaction нэртэй дуу хит болж, Америк, Английн шилдэг дууны жагсаалтуудыг тэргүүлсэн билээ. Тэд ийнхүү уран бүтээлээрээ нэрд гарч байсан ч хар бараан зүйлс ч тэднийг тойрч өнгөрөөгүй юм. 1969 онд Брайн Жонс цаг бусаар хорвоог орхижээ. Хамтлагаасаа гараад сар болоод байсан түүний цогцос усан бассейны ёроолоос олдсон байна. Жонс дөнгөж 27 настай байжээ.
Яваандаа түүний оронд Ронни Вүд ирсэн бөгөөд 1978 онд шинэ бүрэлдэхүүнтэй хамтлаг "Зарим Охид" нэртэй хит цоомог гаргасан байна. Роллинг Стоунз хамтлаг 1989 оныаялан тоглолтоороо 300 сая гаруй долларын ашиг олж, тухай үедээ дээд амжилт тогтоож байжээ.
Рок хамтлаг сүүлийн 10 жилийн хугацаанд ч чамгүй амжилт гаргасан юм. Роллинг Стоунз хамтлагийн 2006 онд Бразилын Рио Де Жанейро хотод хийсэн тоглолтыг сая гаруй хүн үзсэн байна. Рок хамтлаг 50 жилийн ойгоо тохиолдуулан тоглолт хийх эсэх нь тодорхойгүй байна. Гэхдээ тэд ирэх жил аялан тоглолт зохион байгуулж магадгүй тухай мэдээлэл гарчээ.
Э.АМАР