Хошин урлагийн тайзнаа аманцар адтай хэмээх дүгнэлтийг үзэгчдээс хүртэж, Х-ТҮЦ хамтлагт шаггүй олон жил зүтгэсэн жүжигчин Ш. Алтанцэцэг жүжигчин Л.Дэмидбаатар, жүжигчин Аглуу, Дооёо нарыг урвуулан “Гэрэгэ” продакшныг байгуулан хэсэг үзсэн. Тухайн үед топ модель Пүрэвсүрэн хүртэл тус продакшн жүжигчин хийж явсан. Гэсэн ч нэг хоёр тоглолтын ард гараад тус хамтлаг тарж, Аглуу Х-ТҮЦ гэх төрхөмдөө буцаж, Дооёо ДОЗ энтертайнментаа байгуулж, Л.Дэмидбаатар багш болсон бол жүжигчин Ш.Алтанцэцэг эрүүл мэндийн шалтгаанаар хошин урлагаа орхисон гэгддэг. Гэсэн ч түүнийг бөөгийн онгод хүлээн авч удган болсноор уран бүтээлээсээ нэг мөсөн хөндийрсөн гэх мэдээлэл гараад байсан юм. Гэвч жүжигчин Ш.Алтанцэцэг уран бүтээлчийнхээ замд эргэн орж, хошин урлагтаа зүтгэхээр болжээ. Тэрээр “Мөрөөдлийн театр”-ын шинэ уран бүтээлийн нэгэн гоц дүрээр үзэгчидтэйгээ дахин уулзахаар бэлтгэлээ ид идэвхжүүлж байгаа гэнэ.
Э.Гэрэл